سەردێڕ
GMT+3.30 05:35

به‌رنامه‌ و پێڕه‌وی‌ نێوخۆی‌

به‌رنامه‌ و پێڕه‌وی‌ نێوخۆی‌ یه‌كیه‌تیی‌ خوێندكارانی‌ دێموكراتی‌ كوردستانی‌ ئێران په‌سه‌ندكراوی‌ كۆنگره‌ی‌ سێهه‌م “كۆنگره‌ی‌ گه‌شه‌ی‌ بیری دێموكراتیك”
پێشه‌كی‌

سیسته‌می‌ فێركاری‌، به‌ تایبه‌تی‌ خوێندنی‌ باڵا وه‌ك یه‌كێك له‌ ده‌رهاویشته‌كانی‌ مۆدێڕنیته‌، وه‌كو دیارترین پارادۆكس بۆ حكومه‌ته‌ دیكتاتۆره‌‌و داخراوه‌كان به‌ زه‌قی‌ ده‌رده‌كه‌وێ‌. ئه‌م جۆره‌ سیستمه‌ ده‌سه‌ڵاتدارییانه‌ كه‌ به‌ پێی‌ ماهییه‌تیان په‌ره‌پێده‌ری‌ نه‌زانین، بۆ ده‌ست پێڕاگه‌یشتن به‌زانست‌و تكنۆلۆژیای‌ نوێ‌‌و به‌ سه‌رنجدان به‌ پێویستییه‌كانی‌ دنیای‌ نوێ‌ ناچارن ده‌ست بده‌نه‌ دامه‌زران‌و په‌ره‌پێدانی‌ زانكۆ‌و ناوه‌نده‌ فێركارییه‌ باڵاكان. چوونكه‌ به‌ڕێوه‌بردنی‌ كۆمه‌ڵگا له‌ سه‌رده‌می‌ شۆڕشی‌ زانیاری( ئینفۆرماتیك)دا، بێ‌فێربوون‌و به‌ده‌ستهێنانی‌ به‌شێك له‌ لێزانی‌‌و پسپۆرییه‌كان نه‌لواو دێته‌ پێش چاو‌و به‌ده‌ستهێنانی‌ لێزانی‌‌و پسپۆریش به‌ بێ‌ دامه‌زران‌و فراوانكردنی‌ سیستمی‌ فێركردنی‌ باڵا، به‌رهه‌ڤــ نابێت. به‌ڵام هه‌رئه‌م ناوه‌ندانه‌ كه‌ به‌ هۆی‌ رێژیمه‌ تۆتالیتێره‌كانه‌وه‌ پێكده‌هێنرێن، به‌خێراییه‌كی‌ سه‌رسووڕهێنه‌ر ده‌بنه‌ ناوه‌ندی‌ به‌ربه‌ره‌كانێ‌ له‌گه‌ڵ‌ ئه‌و رێژیمه‌ دیكتاتۆرانه‌‌و رووبه‌ڕووی‌ به‌ربه‌ره‌كانێیه‌كی‌ قووڵیان ده‌كه‌نه‌وه‌. چونكه‌ ئه‌و مرۆڤانه‌ی‌ كه‌ له‌م ناوه‌نده‌ زانستی‌‌و فێركارییانه‌دا ده‌خوێنن، به‌ زوویی‌ تێ‌ده‌گه‌ن كه‌ دیكتاتۆر له‌گه‌ڵ‌ زانست‌و مه‌عریفه‌تدا له‌ دژایه‌تییه‌كی‌ ئاشكرادایه‌‌و به‌گه‌وره‌ترین به‌ربه‌ستی‌ ژیارو پێشكه‌وتن ده‌ژمێردرێ‌‌و ئابووری‌ ــ كۆمه‌ڵایه‌تی‌‌و كولتووری‌ پێوه‌ندییه‌كی‌ دوو لایه‌نه‌ی‌ هه‌یه‌ له‌گه‌ڵ‌ گه‌شه‌كردنی‌ سیاسیدا. لێره‌وه‌ خوێندكاران ده‌كه‌ونه‌ پێ‌كۆڵكردنی‌ رێژیمه‌ دیكتاتۆره‌كان بۆ كرانه‌وه‌یان به‌ڕووی‌ دیمۆكراسی‌‌و ئازادیدا، هه‌ر ئه‌مه‌ش زانكۆ‌و ناوه‌نده‌ فێركارییه‌كان ده‌كات به‌ ناوه‌ندی‌ دژایه‌تیی‌ بنه‌ڕه‌تی‌‌و به‌رین به‌ دژی‌ دیارده‌ی‌ سیستمه‌ دیكتاتۆره‌كان‌و ده‌بێته‌ هۆی‌ سه‌رهه‌ڵدانی‌ دیارده‌یه‌ك به‌ ناوی‌ “بزاڤی‌ خوێندكاری‌”‌و ده‌یكاته‌ بوونێكی‌ به‌رهه‌ست (ئۆبژێكتیڤ).

بزاڤی‌ خوێندكاری‌ كوردستان به‌ درێژه‌ده‌ری‌ بزاڤی‌ رۆشنبیری‌ نه‌ته‌وه‌یی‌ كورد دادده‌نرێ‌ كه‌ ژێرخانی‌ هزریی‌ ئه‌م بزاڤه‌ “خودئاگایی‌ نه‌ته‌وه‌یی‌” بوه‌. ریشه‌ی‌ ئه‌م بزاڤه‌ سه‌دان ساڵ‌ خه‌باتی‌ پڕهه‌وراز‌و نشیوی‌ نه‌ته‌وه‌ی‌ كورده‌ له‌پێناو مافه‌ نه‌ته‌وه‌ییه‌كان, كه‌ دواجار ئه‌م بزاڤه‌ له‌ مێژووی‌ هاوچه‌رخماندا به‌دامه‌زراندنی‌ سیسته‌مێكی‌ سه‌رده‌میانه‌ی‌ ده‌سه‌ڵاتداری‌, واته‌ كۆماری‌ كوردستان له‌ ساڵی‌ 1324ی‌ هه‌تاوی‌ (1945 ز)دا, گه‌یشته‌ ترۆپكی‌ خۆی‌‌و له‌وێوه‌ له‌ ژێر تیشكی‌ بنه‌ما مۆدێڕنه‌كانی‌ گه‌ڕان به‌دوای‌ شوناسی‌ نه‌ته‌وه‌یی‌‌دا بناغه‌ی‌ هه‌وڵدانێكی‌ سه‌رده‌میانه‌ بۆ به‌ده‌ست هێنانی‌ مافه‌نه‌ته‌وه‌ییه‌كان‌و رزگاری‌ نه‌ته‌وه‌یی‌ دانرا.

رێبه‌رانی‌ بزاڤی‌ رۆشنبیری‌ كورد هه‌ر ئه‌و تێكۆشه‌رانه‌ بوون كه‌ له‌لایه‌كه‌وه‌ رێبه‌رایه‌تی‌ خه‌باتی‌ نه‌ته‌وه‌یی‌ ـ دیمۆكراتیكی‌ نه‌ته‌وه‌ی‌ كوردیان ده‌كرد‌و له‌لایه‌كی‌ دیه‌وه‌ی‌ تێده‌كۆشان چه‌مك‌و وته‌زا مۆدێڕنه‌كان له‌كۆمه‌ڵگادا بڵاوبكه‌نه‌وه‌. خوێندكارانی‌ كورد وه‌ك به‌شێك له‌و بزاڤه‌ له‌ كۆماری‌ كوردستانه‌وه‌ به‌شێوه‌یه‌كی‌ دیار ده‌رده‌كه‌ون‌و كۆمه‌ڵێكیان به‌رێ‌ ده‌كرێن بۆ ده‌ره‌وه‌ی‌ وڵات بۆ خوێندن. له‌ پاش رووخانی‌ كۆماری‌ كوردستان خوێندكارانی‌ كورد وه‌ك چین‌و توێژه‌كانی‌ دیكه‌ نه‌ته‌وه‌ی‌ كورد به‌شداری‌ خه‌باتی‌ نه‌ته‌وه‌یی‌ ـ دیمۆكراتیكیان كردووه‌ كه‌ ده‌توانین ئاماژه‌ به‌ دامه‌زرانی‌ “ئه‌نجومه‌نی‌ خوێندكاری‌ كورد له‌ ئۆرووپا”، هه‌روه‌ها رۆڵی‌ كه‌سانێك وه‌ك “سمائیل شه‌ریف” زاده‌ له‌ راپه‌ڕینی‌ ساڵانی‌ 46 ـ 47دا، له‌ دوای‌ رووخانی‌ رێژیمی‌ پاشایه‌تی‌‌و رزگاربوونی‌ به‌شێك له‌ خاكی‌ كوردستان، خوێندكارانی‌ كورد به‌ شێوه‌یه‌كی‌ به‌رچاوتر به‌شداریان له‌ خه‌باتدا كردوه‌‌و رۆڵی‌ خۆیان گێڕاوه‌. كۆتاییه‌كانی‌ ده‌یه‌ی‌ شه‌ست به‌ سه‌ره‌تای‌ ده‌ركه‌وتنی‌ كۆمه‌ڵێ‌ گۆڕانكارییه‌ له‌ ئاستی‌ نێوخۆیی‌‌و ده‌ره‌كی‌ كۆمه‌ڵگای‌ كوردی‌ ده‌ژمێردرێ‌. له‌ ئاستی‌ ده‌ره‌كیدا به‌هۆی‌ رووخانی‌ یه‌كیه‌تی‌ سۆڤیه‌ت‌و زاڵبوونی‌ گوتاری‌ نه‌ته‌وه‌یی‌‌و دیمۆكراسی‌ به‌شێوه‌یه‌كی‌ گشتی‌، گه‌شه‌كردن‌و په‌ره‌سه‌ندنی‌ به‌جیهانیبوون‌و هه‌روه‌ها رزگاربوونی‌ كوردستانی‌ عێراق وه‌رچه‌رخانێكی‌ به‌رهه‌ست له‌ هاوكێشه‌ سیاسیه‌كانی‌ رۆژهه‌ڵاتی‌ نێوه‌ڕاستدا هاته‌كایه‌وه‌‌و له‌ چه‌ندین ئاستدا كاریگه‌ریی‌ له‌سه‌ر وڵاتی‌ ئێران‌و هاوكێشه‌ سیاسی‌‌و كۆمه‌لایه‌تیه‌كانی‌ ئه‌و وڵاته‌ دانا. له‌ ئاستی‌ نێوخۆی‌ كۆمه‌ڵگای‌ كوردیشدا به‌هۆی‌ گه‌شه‌كردنی‌ زۆربوونی‌ حه‌شیمه‌ت، په‌ره‌سه‌ندنی‌ شارنشینی‌‌و چوونی‌ ژماره‌یه‌كی‌ زۆرتری‌ رۆڵه‌كانی‌ كورد بۆ زانكۆه‌كان توێژێكی‌ دیاری‌ خوێندكار له‌ نێوه‌ی‌ دووهه‌می‌ ده‌یه‌ی‌ 70 به‌دوا به‌ زه‌قی‌ له‌ كۆمه‌ڵگای‌ كوردستاندا هاته‌ ئاراوه‌.

بزوتنه‌وه‌ی‌ خوێندكاری‌ سه‌رتاسه‌ریی‌ توانی‌ ده‌ورێكی‌ دیكه‌ی‌ سه‌رهه‌ڵدانه‌وه‌ی‌ له‌ سالانی‌ ده‌یه‌ی‌ 70ی‌ هه‌تاوی‌‌و به‌تایبه‌ت نیوه‌ی‌ دووهه‌می‌ ئه‌و ده‌یه‌ ده‌ست پێ‌بكاته‌وه‌‌و له‌ لووتكه‌ی‌ تێكۆشانیدا له‌ 18 پووشپه‌ڕی‌ 1378دا له‌ لایه‌ن رێژیمی‌ كۆماری‌ ئیسلامییه‌وه‌ سه‌ركوت كرا. له‌ قۆناغی‌ دوای‌ پووشپه‌ڕی‌ 1378 به‌ملاوه‌ بزوتنه‌وه‌ی‌ خوێندكاری‌ توانی‌ چوارچێوه‌ی‌ رێكخراوه‌كانی‌ به‌ستراوه‌ به‌ده‌سه‌ڵات تێك بشكێنێ‌‌و تایبه‌تمه‌ندی‌ پێكهاته‌ شكێن وه‌ربگرێ‌‌و ببێ‌ به‌ پێشڕه‌وی‌ ده‌ربڕینی‌ دروشمی‌ دیمۆكراسی‌‌و دادپه‌روه‌ری‌. ئه‌م خواستانه‌ش له‌ راستیدا خواسته‌كانی‌ كۆمه‌ڵگا بوون كه‌ خوێندكاران به‌هۆی‌ ئه‌و تایبه‌تمه‌ندییانه‌ی‌ كه‌ هه‌یانه‌ له‌ زانستیبوون، گه‌نج بوون، ئایدیالیستی‌ بوون‌و كۆنزرڤاتیڤ نه‌بوونی‌ ئابووری‌ زۆر زووتر له‌ چین‌و توێژه‌كانی‌ دیكه‌ ئه‌و خواستانه‌یان ده‌ربڕی‌‌و رووداوه‌كانی‌ دواتری‌ كۆمه‌ڵگای‌ ئێران ئه‌وه‌یان ده‌رخست كه‌ چین‌و توێژه‌كانی‌ دیكه‌ش دێنه‌ مه‌یدان‌و ئه‌و خواستانه‌ ده‌خه‌نه‌ڕوو.

له‌م بارودۆخه‌دا خوێندكاری‌ كوردیش كه‌ خواسته‌ سه‌ره‌كییه‌كانی‌ ره‌نگدانه‌وه‌ی‌ كۆمه‌ڵگای‌ خۆیه‌تی‌، وێڕای‌ هه‌بوونی‌ كه‌م‌و كورتی‌ له‌ باری‌ رێكخستنه‌وه‌ هه‌رده‌م به‌ ده‌نگ‌و خواستی‌ خۆیه‌وه‌ به‌شداری‌ له‌ بزوتنه‌وه‌ی‌ سه‌رانسه‌ری‌ خوێندكاری‌ ئێرانی‌ كردوه‌‌و هه‌میشه‌له‌ ریزی‌ پێشه‌وه‌ی‌ خه‌باتكارانی‌ خواسته‌ دیموكراتیكه‌كاندا بووه‌‌و له‌ هیچ قوربانیدانێك سڵی‌ نه‌كردۆته‌وه‌.

یه‌كیه‌تی‌ خوێندكارانی‌ دیموكراتی‌ كوردستانی‌ ئێران بۆ وه‌ڵامدانه‌وه‌ به‌ پێویستی‌ رێكخراوبوونی‌ بزاڤی‌ خوێندكاری‌ كورد بۆ بوونی‌ به‌ بزوتنه‌وه‌یه‌كی‌ تۆكمه‌، له‌ 23ی‌ رێبه‌ندانی‌ 1383دا له‌ راستای‌ هه‌رچی‌ زیاتر رێكخستن‌و كانالیزه‌ كردنی‌ خه‌بات‌و تێكۆشانی‌ خوێندكاران‌و خوێنده‌ڤانانی‌ كورد له‌ پێناو گه‌یشتن به‌ ئامانجه‌ تایبه‌تییه‌كانی‌ خوێندكاران‌و به‌دیهێنانی‌ ژیانێكی‌ ئازاد‌و مرۆیی‌‌و گه‌یشتن به‌ مافی‌ نه‌ته‌وایه‌تی‌ رێگرتن له‌ په‌رشوبڵاوی‌ هێزی‌ مرۆیی‌ خوێندكاری‌ كورد دامه‌زراوه‌‌و به‌ سه‌رنجدان به‌ ئاڵوگۆڕه‌ پێشهاتووه‌كان له‌ هه‌ر سه‌رده‌مێكدا، درێژه‌ به‌ خه‌باتی‌ خۆی‌ ده‌دات. خه‌بات و قوربانیدانی‌ خوێندكارانی‌ ئازادیخواز و دلێری‌ كورد له‌ راستای‌ مافه‌ دێموكراتیكی‌ و نه‌ته‌وه‌ییه‌كاندا وێردی‌ سه‌رزمانی‌ هه‌ر مرۆڤێكی‌ ئازادیخواز و خاوه‌ن ویژدانه‌و ناوی‌ خوێندكارانێكی‌ دلێر و ئازادیخوازی‌ وه‌ك ئیبراهیم لوتفوڵایی‌ و كیانووش ئاسا و محه‌مه‌د جه‌وادی‌ په‌ره‌نداخ….هتد، بۆ هه‌تا هه‌تایه‌ ده‌مێنێته‌وه‌. یه‌كیه‌تی‌ خوێندكاران وێڕای‌ پێداگری‌ له‌سه‌ر رێزگرتنی‌ مرۆڤه‌كان‌و خۆشویستنیان، ناتوانێ‌ مرۆڤــ وه‌ك بوونه‌وه‌رێكی‌ بێ‌ئه‌زموون سه‌یر بكات‌و وه‌های‌ وێنا بكات كه‌ تا ئێستا هیچی‌ نه‌كردوه‌, به‌ڵكو كار له‌سه‌ر ئه‌وه‌ ده‌كات كه‌ باشترین ئه‌زموونه‌كانی‌ مرۆڤایه‌تی‌ بنیات بنێ‌‌و سه‌ره‌ڕای‌ هه‌موو ئه‌و ناهه‌قیانه‌ی‌ كه‌ به‌رامبه‌ر به‌ مرۆڤه‌كان كراون‌و ده‌كرێن‌و ئه‌گه‌ری‌ ئه‌وه‌ هه‌یه‌ بكرێن, هێشتا هیوایه‌كی‌ گه‌ش هه‌یه‌ كه‌ به‌ گه‌ره‌نتی‌ كردنی‌ مافه‌كانمان بتوانین پێكه‌وه‌ ئه‌زموونه‌ مرۆییه‌كانمان وه‌سه‌ر یه‌ك بخه‌ین‌و مانایه‌كی‌ دره‌وشاوه‌ له‌ ژیانی‌ مرۆیی‌ بخه‌ینه‌ به‌رچاو. ئه‌گه‌رنا هه‌ر مرۆڤ یان نه‌ته‌وه‌یه‌ك بۆی‌ هه‌یه‌ كه‌ رێگا‌و چاره‌نووسێكی‌ دیكه‌ بگرێته‌ پێش كه‌بتوانێ‌ ئاسووده‌یی‌ خۆی‌‌و هاوچه‌شنه‌كانی‌ به‌ بێ‌زه‌ره‌ر گه‌یاندن به‌ ئه‌وانی‌ تر مسۆگه‌ر بكات.

 

به‌ رنامه‌و پێڕه‌وی‌ یه‌كیه‌تیی‌ خوێندكارانی‌ دێموكراتی‌ كوردستانی‌ ئێران
به‌شی‌ یه‌كه‌م: ناو

ماده‌ی‌ 1: ناوی‌ رێكخراو

ناوی‌ رێكخراو‌ “یه‌كیه‌تیی‌ خوێندكارانی‌ دێموكراتی‌ كوردستانی‌ ئێران”ه‌، كه‌ له‌ هه‌موو شوێنێكی‌ ئه‌م به‌رنامه‌و پێڕه‌وه‌دا به‌ یه‌كیه‌تی‌ هاتووه‌.

یه‌كیه‌تیی‌ خوێندكارانی‌ دێموكراتی‌ كوردستانی‌ ئێران، رێكخراوی‌ هه‌موو خوێندكار‌و خوێنده‌ڤانێكی‌‌ ئازادیخواز‌و دێموكراتی‌ كورد و كوردستانییه‌ له‌ ئێراندا.

تێبینی‌: 1ـ لێره‌دا مه‌به‌ست له‌ خوێنده‌ڤان هه‌ر كه‌سێكه‌ كه‌ ده‌رچووی‌ ناوه‌ندێكی‌ زانستی‌ وه‌ك زانكۆ یا په‌یمانگا بێت.

به‌شی‌ دووهه‌م: ئامانجه‌كان

ماده‌ی1: ئامانج و ئه‌ركه‌كانی‌ یه‌كیه‌تیی‌ خوێندكارانی‌ دێموكراتی‌ كوردستانی‌ ئێران.

ئامانجه‌كانی‌ یه‌كیه‌تی‌، رێكخستنی‌ خوێندكار و خوێنده‌ڤانانی‌‌ خه‌باتكار ‌و ئازادیخوازی‌ كورد و كوردستانییه‌ له‌ ئێراندا، به‌ مه‌به‌ستی

ئا) گشتییه‌كان، په‌یوه‌ست به‌ كۆی‌ پێكهاته‌ی‌ كۆمه‌ڵگا

پشتگیری‌‌و به‌شداریی‌ چالاكانه‌ له‌ بزووتنه‌وه‌ی‌‌ نه‌ته‌وه‌یی‌‌ – دێموكراتیكی‌ گه‌لی‌ كورد.

2- تێكۆشان به‌ مه‌به‌ستی‌ سه‌قامگیر كردنی‌ سیستمێكی‌ دێموكراتیك ‌و ده‌روه‌ست به‌ بنه‌ما جیهانییه‌كانی‌ مافی‌ مرۆڤ، هاوشان له‌گه‌ڵ چین‌و توێژه‌ كۆمه‌ڵایه‌تی‌یه‌كانی‌ دیكه‌ی‌ ئێران.

3ـ هه‌وڵدان له‌ راستای‌ پێكهێنانی‌ فه‌رهه‌نگێكی‌ نه‌ته‌وه‌خوازیی‌ دروست له‌ سه‌ر بنه‌مای‌ رێز گرتن له‌ سیمبۆل و به‌ها نه‌ته‌وه‌ییه‌كان.

4ـ هه‌وڵدان به‌ مه‌به‌ستی‌ وه‌به‌رچاو خستنی‌ راستییه‌كانی‌ كۆمه‌ڵگای‌ ئێران و دواجار ره‌نگدانه‌وه‌ی‌ له‌ ناو سیستمی‌ سیاسیی‌ چه‌سپاو له‌ كۆمه‌ڵگادا.

5ـ هه‌وڵدان به‌ مه‌به‌ستی‌ پێشگرتن و رووبه‌ڕووبوونه‌وه‌ی‌ ئاوه‌زمه‌ندانه‌ له‌ گه‌ڵ هه‌رجۆره‌ راڤه‌یه‌كی‌ به‌رته‌سكی‌ ئایدۆلۆژیكی‌ چه‌مك و به‌هاكان، به‌ مه‌به‌ستی‌ پێشگیری‌ له‌ په‌ره‌سه‌ندنی‌ تاك ره‌نگی‌ و یه‌كده‌ست كردنی‌ كۆمه‌ڵگا و ره‌گه‌زپه‌ره‌ستی‌.

6- هه‌وڵدان بۆ پێكهێنانی‌ پێوه‌ندی‌‌و دیالۆگێكی‌ بنیاتنه‌ر له‌گه‌ڵ رێكخراوه‌ خوێندكاریی‌یه‌كانی‌ به‌شه‌كانی‌ ‌دیكه‌ی‌ كوردستان

.

7- هه‌وڵدان بۆ به‌رزكردنه‌وه‌ی‌ ئاستی‌ رووناكبیری و زانستیی‌‌ خوێندكار‌و به‌هێز كردنی‌ پێوه‌ندی‌یه‌كانی‌ زانكۆ له‌گه‌ڵ شوێن‌و ناوه‌نده‌ رووناكبیری‌ و مه‌ده‌نی‌ و حكومییه‌كان به‌ مه‌به‌ستی‌ په‌ره‌پێدانی‌ كۆمه‌ڵگای‌ مه‌ده‌نی‌.

8- هه‌وڵدان بۆ پێوه‌ندی‌ گرتن له‌گه‌ڵ‌ رێكخراوه‌ خوێندكارییه‌ بیانی‌‌و نێونه‌ته‌وه‌ییه‌كان.

ب) تایبه‌ت به‌ خوێندكاری‌

1ـ هه‌وڵدان بۆ داڕشتنی‌ تیۆریكی‌ بزووتنه‌وه‌ی‌‌ خوێندكاری‌ به‌ شێوازی‌ عه‌قڵانییه‌تی‌ ره‌خنه‌یی‌.

2ـ به‌شداریی‌ بزوتنه‌وه‌ی‌ خوێندكاریی‌ كورد له‌ بزووتنه‌وه‌ی‌ خوێندكاریی‌ سه‌رتاسه‌ریی‌ ئێراندا، وه‌ك یه‌كێك له‌ بناغه‌ به‌هێزه‌كانی‌ ئه‌م بزاڤه‌.

3ـ هه‌وڵدان بۆ پێكهێنانی‌ هاوبیری‌، هاوڕێیی‌‌ و هاریكاریی‌ پراكتیكیی‌ خوێندكارانی‌ كورد له‌ گه‌ڵ خوێندكارانی‌ ئازادیخوازی‌ نه‌ته‌وه‌كانی‌ دیكه‌ی‌ ئێران به‌ مه‌به‌ستی‌ به‌دیهێنانی‌ ئامانجه‌ هاوبه‌شه‌كان.

4ـ هه‌وڵدان بۆ پێكهێنانی‌ پێوه‌ندییه‌كی‌ دینامیك له‌ نێوان قوتابیان‌و بزووتنه‌وه‌ی‌ خوێندكاریدا، وه‌ك هاوڕێ‌و پشتیوانی‌ ئه‌م بزاڤه‌.

5ـ هه‌وڵدان بۆ به‌ ده‌ستهێنان‌و گه‌شه‌ پێدانی‌ ئاستی‌ ئازادی‌یه‌ سیاسی‌ ‌و كۆمه‌ڵایه‌تی‌یه‌كان له‌ زانكۆدا.

6ـ تێكۆشان به‌ مه‌به‌ستی‌ نه‌هێشتنی‌ هه‌رچه‌شنه‌ هه‌ڵاواردنێك له‌ سه‌ر بنه‌مای‌ هه‌ر جۆره‌ جیاوازییه‌ك و نه‌هێشتنی‌ هه‌ڵاواردنی‌ ره‌گه‌زی‌‌و قه‌ره‌بووكردنه‌وه‌یان.

7ـ خه‌بات بۆ پاراستنی‌ رێز‌و سه‌ربه‌خۆیی‌ زانكۆ‌و پێشگیری‌ له‌ ده‌ستێوه‌ردانی‌ هێزه‌ نیزامی‌ و ئه‌منییه‌تییه‌كان له‌ زانكۆدا.

8- هه‌وڵدان بۆ سه‌ربه‌خۆ كردنی‌ زانكۆكان له‌ رووی‌ داراییه‌وه‌ به‌ مه‌به‌ستی‌ ده‌ست كراوه‌یی‌ له‌ هه‌مبه‌ر په‌ره‌پێدانی‌ ئاستی‌ چه‌ندایه‌تی‌ و چۆنایه‌تی‌ تێیاندا.

به‌شی سێهه‌م پێره‌وی‌ نێوخۆیی‌ یه‌كیه‌تیی‌ خوێندكارانی‌ دێموكراتی‌ كوردستانی‌ ئێران
ماده‌ی‌ 1: پێكهاته‌ی‌ رێكخراوه‌یی‌ یه‌كیه‌تیی‌ خوێندكارانی‌ دێموكراتی‌ كوردستانی‌ ئێران

پێكهاته‌ی‌ یه‌كیه‌تی‌ بریتیه‌ له‌: 1- كۆنگره‌ 2- لێژنه‌ی‌ به‌ڕێوه‌به‌ری‌ 3- كۆمیته‌ 4- ئه‌ندام

ماده‌ی‌ 2: كۆنگره‌

كۆنگره‌ به‌رزترین ناوه‌ندی‌ بریاردانی‌ یه‌كیه‌تییه‌، كه‌ به‌ به‌شداریی‌ نوێنه‌رانی‌ هه‌ڵبژێردراوی‌ ئه‌ندامانی‌ یه‌كیه‌تی‌ ده‌به‌سترێ‌. 2-1 كۆبوونه‌وه‌كانی‌ كۆنگره‌ به‌ ئاماده‌ بوونی‌ 3/2 ئه‌ندامه‌كانی‌ فه‌رمی‌ ده‌بن.

تێبینی‌1: كۆنگره‌ به‌ ئاماده‌یی‌ نوێنه‌رانی‌ ئه‌ندامانی‌ یه‌كیه‌تی‌، به‌ پێی‌ ئه‌و راده‌یه‌ی‌ كه‌ لیژنه‌ی‌ به‌رێوه‌به‌ری‌ دیاریی‌ ده‌كاو له‌ كۆنفرانسدا هه‌ڵده‌بژێردرێن، ده‌به‌سترێ‌. تێبینی2: ڕێژه‌ی‌ نوێنه‌رانی‌ به‌شدار له‌ كونگره‌ نابێ‌ كه‌متر له‌ دوو به‌رابه‌ری‌ ئه‌ندامانی‌ ئه‌سڵی‌‌و جێگری‌ به‌رێوه‌به‌ری‌ بێ‌. ئه‌ندامانی‌ ئه‌سڵی‌ و جێگر راسته‌وخۆ به‌شداری‌ كۆنگره‌ ده‌بن.

ماده‌ی‌ 3: كۆنگره‌ی‌ ئاسایی‌

كۆنگره‌ی‌ ئاسایی‌ دوو ساڵ جارێك ده‌به‌سترێ‌. 3-1: ئه‌رك‌و ده‌سه‌ڵاته‌كانی‌ كۆنگره‌ی‌ ئاسایی‌ بریتین له‌: ئا) بیستن‌و په‌سه‌ند كردنی‌ راپۆرتی‌ دووساڵه‌ی‌ لێژنه‌ی‌ به‌ڕێوه‌به‌ری‌. ب) دیاریكردنی‌ سیاسه‌ته‌ گشتییه‌كانی‌ یه‌كیه‌تی. پ – لێكدانه‌وه‌ی‌ كاركردی‌ ئورگانه‌كانی‌ یه‌كیه‌تی. ت – گۆڕین یا چاككردنه‌وه‌‌و په‌سه‌ند كردنی‌ نێو ئاخنی‌ به‌رنامه‌و پێڕه‌وی‌ یه‌كیه‌تی.‌ ج – هه‌ڵبژاردنی‌ ئه‌ندامانی‌ لێژنه‌ی‌ به‌ڕێوه‌به‌ری. 3-2 بۆ په‌سه‌ند كردنی‌ هه‌ر بابه‌تێك له‌ كۆنگره‌دا، ده‌نگی‌ ئه‌رێنیی‌ (نیوه‌ زێده‌ یه‌ك)ی‌ ئه‌ندامانی‌ به‌شدار بوو پێویسته‌.

تێبینی‌: كه‌سێك كه‌ خۆی‌ بۆ ئه‌ندامه‌تی‌ لیژنه‌ی‌ به‌ڕێوه‌به‌ری‌ هه‌ڵده‌بژێرێ‌، لانی‌ كه‌م پێویسته‌ پێشینه‌ی‌ شه‌ش مانگ ئه‌ندامه‌تیی‌ سه‌ره‌كیی‌ له‌ یه‌كیه‌تیدا هه‌بێت.

ماده‌ی‌ 4: كۆنگره‌ی‌ نائاسایی‌:

كۆنگره‌ی‌ نائاسایی‌به‌ داخوازیی‌3/2ی‌ ئه‌ندامانی‌ لێژنه‌ی به‌ڕێوه‌به‌ری‌‌و یا له‌ سه‌ر داوای‌ به‌ نووسراوه‌ پێشكه‌شكراوی‌ پتر له‌ 2/1 كۆمیته‌ ناوچه‌یی‌یه‌كانی‌ یه‌كیه‌تی‌ له‌ لێژنه‌، ده‌به‌سترێ‌. 4ـ 1 ئه‌رك‌و ده‌سه‌ڵاته‌كانی‌ كۆنگره‌ی‌ نائاسایی‌ هه‌ر وه‌ك كۆنگره‌ی‌ ئاسایی‌یه‌.

ماده‌ی‌ 5: لێژنه‌ی‌ به‌ڕێوه‌به‌ری‌

لێژنه‌ی‌ به‌ڕێوه‌به‌ریی‌ یه‌كیه‌تی‌ له‌ 9 ئه‌ندامی‌ سه‌ره‌كی‌‌و 5 جێگر پێك دی‌ كه‌ له‌ نێوان ئه‌ندامانی‌ ‌ یه‌كیه‌تیی‌ به‌شدار له‌ كۆنگره‌‌(به‌ سه‌رنجدان به‌ تێبینی‌ ماده‌ی‌ 3) و بۆ ماوه‌ی‌ 2 ساڵ هه‌ڵده‌بژێردرێن. پاش كۆنگره‌ ئه‌م لێژنه‌یه‌ به‌رزترین ناوه‌ندی‌ بڕیاردانی‌ یه‌كیه‌تی‌یه‌.

تێبینی‌1 : ته‌نیا له‌ كاتی‌ كشانه‌وه‌ یا مردنی‌ هه‌ر كام له‌ ئه‌ندامانی‌ لێژنه‌ی‌ به‌ڕێوه‌به‌ریدایه‌ كه‌ ئه‌ندامانی‌ جێگر به‌ پێی‌ ته‌رتیبی‌ ژماره‌ی‌ ده‌نگه‌كانیان له‌ كۆنگره‌دا، بۆ ده‌رفه‌تی‌ پاشماوه‌ هه‌ڵده‌بژێردرێن. تێبینی‌2: كۆبوونه‌وه‌كانی‌ لێژنه‌ی‌ به‌ڕێوه‌به‌ری‌ به‌ به‌شداریی‌ ئه‌ندامانی‌ سه‌ره‌كی‌‌و به‌ به‌شداریی‌ و به‌ بێ‌ مافی‌ ده‌نگدانی‌ ئه‌ندامانی‌ جێگر ده‌گیردرێن. تێبینی‌3: لیژنه‌ی‌ به‌ڕێوه‌به‌ری‌ ده‌بێ‌ لانیكه‌م 3 مانگ جارێك كۆبوونه‌وه‌كانی‌ بگرێ‌.

5-1 ئه‌رك‌و ده‌سه‌ڵاته‌كانی‌ لێژنه‌ی‌ به‌ڕێوه‌به‌ری‌ بریتین له‌: ئا – هه‌ڵبژاردنی‌ سكرتێری‌ یه‌كیه‌تی‌‌و كه‌سێك وه‌ك جێگر سكرتێر له‌ نێوان ئه‌ندامانی‌ سه‌ره‌كیی‌ لێژنه‌ی‌ به‌ڕێوه‌به‌ریدا. ب – ئاماده‌كردنی‌ پێڕه‌وی‌ نێۆخۆی‌‌ لێژنه‌ی‌ به‌ڕێوه‌به‌ری‌. پ – ئاماده‌كاری‌ بۆ گرتنی كۆنگره‌ی یه‌كیه‌تی خوێندكاران. ت – بیستنی‌ راپۆرتی‌ كۆمیته‌كان‌و چاوه‌دێریی‌ كاره‌كانیان. ح – هه‌ڵبژاردنی‌ به‌رپرسانی‌ كۆمیته‌ سه‌ره‌كییه‌كان. خ – پێداچوونه‌وه‌ی‌ راپۆرتی‌ ماڵیی‌ یه‌كیه‌تیی‌. ج – په‌سه‌ند كردنی‌ پێڕه‌وی‌ كۆمیته‌كان.

تێبینی‌1: ئه‌ركه‌كانی‌ سكرتێری‌ یه‌كیه‌تی‌ بریتین له‌: ـ پێكهێنانی‌ هاوئاهه‌نگی‌ له‌ نێوان ئه‌ندامانی‌ لێژنه‌ی‌ به‌ڕێوه‌به‌ری‌، ـ پێكهێنان‌و به‌ڕێوه‌بردنی‌ كۆبوونه‌وه‌كانی‌ ئه‌و لێژنه‌یه‌ ـ رێكوپێك كردنی‌ پڕۆگرامی‌ كۆبوونه‌وه‌كان‌و راگه‌یاندنی‌ په‌سه‌ند كراوه‌كانیش به‌ به‌رپرسانی‌كۆمیته‌ سه‌ره‌كی‌یه‌كان.( دیاره‌ له‌ نه‌بوونی‌ سكرتێردا جێگری‌ سكرتێر ئه‌ركه‌كان ده‌گرێته‌ ئه‌ستۆ). تێبینی‌ 2: هه‌ر كاتێك یه‌كێ‌ له‌ ئه‌ندامانی‌ به‌ڕیوه‌به‌ری‌ ئه‌ركه‌كانی‌ خۆی به‌جێ نه‌گه‌یه‌نێت، ئه‌وا لێژنه‌ی‌ به‌ڕێوه‌به‌ری‌ بۆی هه‌یه‌ به‌ پێی ئایین‌ نامه‌ی‌ نێوخۆ سزای‌ بدات.

5- 2 كۆبوونه‌وه‌كانی‌ لێژنه‌ی‌ به‌ڕێوه‌به‌ری‌ به‌ ئاماده‌بوونی‌ لانی‌ كه‌می‌3/2ی‌ ئه‌ندامانی‌ سه‌ره‌كی‌ ره‌سمی‌ ده‌بن.

5-3 بریاره‌كانی‌ لێژنه‌ی‌ به‌ڕێوه‌به‌ری‌ پێویستی‌ به‌ ده‌نگی‌ ئه‌رێنیی‌ (نیوه‌ زێده‌ یه‌ك)ی‌‌ ئه‌ندامانی‌ سه‌ره‌كیی‌ به‌شدار له‌ كۆبوونه‌وه‌دا، هه‌یه‌.

ماده‌ی‌ 6: كۆمیته‌

كۆمیته‌كان دوو جۆرن: ئا:كۆمیته‌ سه‌ره‌كییه‌كان ب:كۆمیته‌ ناوچه‌یی‌یه‌كان لانی‌ زۆری‌ ئه‌ندامانی‌ كۆمیته‌ 5 كه‌سن، كه‌ له‌ كۆنفرانسه‌ ناوچه‌ییه‌كاندا هه‌ڵده‌بژێردرێن و یه‌كێكیان به‌رپرسی‌ كۆمیته‌یه‌‌و ئه‌وانی‌ دیكه‌ ئه‌ندامانی‌ كۆمیته‌ن.

6 -1: كۆمیته‌ سه‌ره‌كی‌یه‌كان بریتین له‌: 1ـ كۆمیته‌ی‌ رێكخستن(ته‌شكیلاتی‌ ئاشكرا و نهێنی‌) 2ـ كۆمیته‌ی‌ راگه‌یاندن 3 ـ كۆمیته‌ی‌ فێركردن(ئاموزش) 4 ـ كۆمیته‌ی‌ ماڵی‌ – به‌ڕێوه‌به‌ری‌ 5ـ كۆمیته‌ی‌ پێوه‌ندییه‌ گشتی‌یه‌كان

6- 2: ئه‌ركه‌كانی‌ كۆمیته‌ سه‌ره‌كی‌یه‌‌كان: كۆمیته‌ی‌ رێكخستن(ته‌شكیلات): به‌رپرسی‌ پێوه‌ندی‌یه‌ رێكخراوه‌یی‌یه‌كانی‌ ئه‌ندامانی‌ یه‌كیه‌تی و كۆمیته‌ ناوچه‌یی‌یه‌كانه‌ له‌گه‌ڵ لێژنه‌ی‌ به‌ڕێوه‌به‌ری‌دا. كۆمیته‌ی‌ راگه‌یاندن: به‌رپرسی‌ راگه‌یه‌نه‌ فه‌رمییه‌كانی‌ یه‌كیه‌تییه‌. كۆمیته‌ی‌ فێركردن: چالاكییه‌ فێركاری‌یه‌كانی‌ یه‌كیه‌تی‌‌و په‌روه‌رده‌و بارهێنانی‌ ئه‌ندامانی‌ یه‌كیه‌تی‌ له‌ ژێر چاوه‌دێریی‌ ئه‌م كۆمیته‌یه‌دایه‌. كۆمیته‌ی‌ ماڵی‌ – به‌ڕێوه‌به‌ری‌: به‌رپرسی‌ كار‌و باری‌ ماڵی‌‌و پاراستنی‌ به‌ڵگه‌نامه‌كانی‌ یه‌كیه‌تییه‌‌و پێره‌وی‌ مافی‌ ئه‌ندامه‌تی‌ بۆ په‌سه‌ندكردن، پێشكه‌ش به‌ لێژنه‌ی‌ به‌ڕێوه‌به‌ری‌ ده‌كات. كۆمیته‌ی‌ پێوه‌ندی‌یه‌ گشتی‌یه‌كان: ئه‌م كۆمیته‌یه‌ هه‌موو پێوه‌ندی‌یه‌ ده‌ره‌كی‌یه‌كانی‌ یه‌كیه‌تی‌ له‌گه‌ڵ كه‌سایه‌تی‌‌و رێكخراوه‌كانی‌ دیكه‌ی‌ له‌ ئه‌ستۆدایه‌.

6-3: كۆمیته‌ ناوچه‌ییه‌كان كۆمیته‌ی‌ ناوچه‌یی‌، لێژنه‌یه‌كی‌ 5 كه‌سییه‌ بۆ به‌رێوه‌بردنی‌ كاروباری‌ یه‌كیه‌تی‌ له‌ ناوچه‌یه‌كی‌ دیاریكراودا‌ و دوو جۆرن: 1- كۆمیته‌ی‌ یه‌كه‌ 2- كۆمیته‌ی‌ كۆمه‌ڵه‌ به‌رپرسی‌ هه‌ر كۆمیته‌یه‌كی‌ ناوچه‌یی‌ به‌ هه‌ڵبژاردن له‌ نێو ئه‌ندامانی‌ كۆمیته‌دا دیاری ده‌كرێ و به‌‌ لێژنه‌ی‌ به‌ڕێوه‌به‌ری ده‌ناسرێت.

پێناسه‌:

یه‌كه‌: یه‌كه‌یه‌كی‌ فێركارییه‌ كه‌ ده‌توانێ‌ كۆلیژ یا په‌یمانگه‌یه‌ك بێت. كۆمه‌ڵه‌: له‌ كۆمه‌ڵه‌یه‌كی‌ پێوه‌ندی‌دار پێكه‌وه‌ پێك دی‌، وه‌ك زانكۆ پزیشكی‌یه‌كان یا یه‌كه‌كانی‌ ناوچه‌یه‌كی‌ جوگرافیایی‌.

6-4: كۆمیته‌ی‌ كۆمه‌ڵه‌ له‌ سه‌ر داوای‌ كۆمیته‌ی‌ یه‌كه‌ پێوه‌ندی‌داره‌كان‌و به‌ په‌سه‌ندكردنی‌ لێژنه‌ی‌ به‌ڕێوه‌به‌ری‌ پێك دێ‌.

تێبینی‌: لێژنه‌ی‌ به‌ڕێوه‌به‌ری‌ راسته‌وخۆ ده‌توانێ‌ كۆمیته‌ی‌ كۆمه‌ڵه‌ پێك بێنێ‌.

6-5: ئه‌رك‌و ده‌سه‌ڵاتی‌ كۆمیته‌ ناوچه‌ییه‌كان ئا ـ دارشتنی‌ پێره‌وی‌ كۆمیته‌‌و پێشكه‌شكردنی‌ به‌ لێژنه‌ی‌ به‌ڕێوه‌به‌ری‌ بۆ په‌سندكردن ب – پێشكه‌شكردنی‌راپۆرت به‌ لێژنه‌ی‌ به‌ڕێوه‌به‌ری.‌ پ – جێبه‌جێكردنی‌ په‌سه‌ندكراوه‌كانی‌ لێژنه‌ی‌ به‌ڕێوه‌به‌ری. ت – پشت راستكردنی‌ ئه‌ندامه‌تیی‌ ئه‌ندامه‌كان.

تێبینی‌1: كۆمیته‌ ناوچه‌ییه‌كان سه‌ره‌ڕای‌ بڕگه‌ی‌ 6-5، ده‌توانن به‌ په‌سه‌ندی‌ لێژنه‌ی‌ به‌ڕێوه‌به‌ری‌ سیاسه‌ته‌ ناوچه‌ی‌یه‌كانی‌ یه‌كیه‌تی‌ دیاری‌ بكه‌ن. تێبینی‌2: له‌ ژێر چاوه‌دێریی‌ كۆمیته‌ی‌ راگه‌یاندندا كۆمیته‌ ناوچه‌ی‌یه‌كان ده‌توانن، جگه‌ له‌ راگه‌یه‌نه‌ سه‌ره‌كی‌یه‌كانی‌ یه‌كیه‌تی‌، راگه‌یه‌نی‌ تایبه‌ت به‌ خۆیشیان هه‌بێ‌.

ماده‌ی‌ 7: ئه‌ندامه‌تی‌

یه‌كیه‌تی‌ دوو جۆره‌ ئه‌ندامی‌ هه‌یه‌ 1- سه‌ره‌كی‌ 2- تاقی‌كاری‌

7- 1: هه‌ر خوێندكار یان خوێنده‌ڤانێكی‌ كورد و كوردستانی‌ له‌ ئێراندا، پاش قبوول كردنی‌ ئه‌م مه‌رجانه‌ی‌ خواره‌وه‌ ده‌توانێ‌‌ ببێت‌ به‌ ئه‌ندامی‌ سه‌ره‌كیی‌ یه‌كیه‌تی‌: ئا- قبوول كردنی‌به‌رنامه‌‌و پێڕه‌وی‌ یه‌كیه‌تی.‌ ب – خوێندكار بێ‌ یا خوێندنی‌ باڵای‌ لانی‌ كه‌م له‌ ئاستی‌ كارزانی ‌(فه‌وق دیپلوم) دا ته‌واو كردبێت. پ – ئه‌ندامی‌ هیچ رێكخراو‌و رێكخستنێكی‌ خوێندكاریی‌‌ دیكه‌، نه‌بێت. ت – بۆ ماوه‌ی‌ شه‌ش مانگ له‌ ژێر تاقی‌كردنه‌وه‌دا بێت.

تێبینی‌1: به‌ندی‌ (پ) رێكخراوه‌ خوێندكارییه‌ دێموكراتیكه‌كانی‌ رۆژئاوا ناگرێته‌وه‌. تێبینی‌2: ئه‌و خوێندكارانه‌ی‌ كه‌ به‌ هۆی‌ گوشاری‌ ده‌سه‌ڵاتی‌ سیاسیی‌ حاكم له‌ درێژه‌دانی‌ خوێندنی‌ زانكۆ بێ‌به‌ش ده‌كرێن، به‌پێی‌ مه‌رجه‌كانی‌ دیاریكراو له‌ لایه‌ن لیژنه‌ی‌ به‌ڕێوه‌به‌رییه‌وه‌ ده‌كرێ‌ به‌ ئه‌ندام وه‌ر بگیرێن.

-1: ئه‌ركه‌كانی‌ ئه‌ندامه‌كان بریتین له‌: ئا ـ به‌شداری‌ له‌ كار‌و چالاكییه‌كانی‌ یه‌كیه‌تیدا. ب – كار‌و چالاكی‌ له‌ یه‌كێك له‌ به‌شه‌ سه‌ره‌كییه‌كانی‌ یه‌كیه‌تیدا. پ – دانی‌ مافی‌ ئه‌ندامه‌تی‌ به‌ پێی‌ پێڕه‌وی‌ پێوه‌ندی‌دار. ت ـ هه‌وڵدان له‌ راستای‌ به‌ره‌وپێش بردنی‌ سیاسه‌ته‌كانی‌ یه‌كیه‌تی‌.

تێببینی‌: ئه‌ندامانی‌ خوێندكار كه‌ ناتوانن له‌ كۆمیته‌ی‌ یه‌كه‌ دا چالاكی‌ بنوێنن، ده‌توانن له‌ كۆمیته‌ی‌ كۆمه‌ڵه‌دا خه‌ریكی‌ كار‌و چالاكی‌ بن.

ماده‌ی 9: مافی ئه‌ندام

9-1

: ئه‌ندامانی‌ رێكخراوه‌ مافی‌ به‌شداری له‌ هه‌لبژاردن و به‌ربژار كردنی خۆی‌ له‌ هه‌لبژاردنی كۆنگره‌ و لێژنه‌ی به‌ رێوه‌ به‌ری دا هه‌یه‌. 9-2: هه‌موو ئه‌ندامێكی رێكخراو مافی ئه‌وه‌ی هه‌یه‌ ره‌خنه‌ و پێشنیاره‌كانی خۆی له‌ پێوه‌ندی له‌گه‌ل كاروباری به‌شه‌كانی یه‌كیتیه‌كه‌دا بگه‌ێنێه‌ لایه‌نی پێوه‌ندیدار.

ماده‌ی‌ 10: سزای‌ ئه‌ندامان

هه‌ر كاتێك ئه‌ندام ئه‌ركه‌كانی‌ خۆی‌ جێبه‌جێ‌ نه‌كات یان كرده‌وه‌یه‌كی‌ وا ئه‌نجام بدات كه‌ له‌گه‌ڵ پرنسیبه‌كانی‌ یه‌كیه‌تیی خوێندكاران‌دا نه‌گۆنجێت، سزا ده‌ده‌رێت.

سزاكان بریتین له‌: سه‌ركۆنه‌ به‌ ده‌م سه‌ركۆنه‌ به‌ نووسراوه‌ هه‌ڵپه‌ساردن ده‌ركردن

تێبینی‌: ماوه‌ی‌ هه‌ڵپه‌ساردن له‌ یه‌ك مانگ تاكوو شه‌ش مانگ ده‌بێت.

به‌شی‌ چواره‌م: كار‌وباری‌ ماڵی‌

سه‌رچاوه‌ ماڵی‌یه‌كان سه‌رچاوه‌ ماڵی‌یه‌كانی‌ یه‌كیه‌تی بریتین له‌: – مافی‌ ئه‌ندامه‌تیی‌ ئه‌ندامه‌كان. – یارمه‌تییه‌ ماڵییه‌كانی‌ ئه‌ندامان‌و دۆستانی‌ یه‌كیه‌تی.‌ – چالاكییه‌ ئابوورییه‌كانی‌ یه‌كیه‌تی‌.

ماڤی بڵاو کراوەکانی ئەو ماڵپەرە پارێزراوە بۆ یەکێتی خوێندکارانی کوردستانی ئێران

Login

Lost your password?